Møteplass for europeiske regionar

I forkant av sjølve komitémøtet blei det arrangert eit seminar om EUs landbrukspolitikk (CAP), med tittelen ”The EU Common Agricultural Policy & non-EU member regions - impacts, interactions, perspectives”. Her diskuterte deltakarane korleis CAP påverkar landbrukspolitikken og den regionale utviklinga i land som står utanfor EU. Sjølv om landbruk ikkje er ein del av EØS-avtala, får EUs politikkutvikling også på dette området konsekvensar for Norge og dei andre EFTA-landa.

Det andre temaet for konferansen i Østfold var entreprenørskap og innovasjon – sentrale element i den framtidige kunnskapsøkonomien i Europa og nøkkelen til å kome ut av finanskrisa. Her blei det vist erfaringar og gode eksempel på innovasjonsarbeid innan klima og energi, regional utvikling, distriktsutvikling og utdanning.

Eit gjennomgåande tema var korleis regionane i Europa kan jobbe i fellesskap for å bli høyrt i EU. Gjennom ein organisasjon som AER kan regionane snakke med éi stemme, noko som gjer det enklare å få gjennomslag for viktige synspunkt. Innanfor AER er alle regionar likestilt – i voteringssaker er det éi stemme pr. region. Det betyr at små norske regionar har like stor sjanse for å påverke som store, meir folkerike regionar. For Norge som ikkje-EU-land er det ekstra viktig å bruke dei kanalane ein har, som f.eks. medlemsskapet i AER, til å påverke saker som i stor grad angår norske kommunar og fylkeskommunar. Så langt er meir enn 7000 EU-rettsakter tatt inn i EØS-avtala. Det er mulig å ha innverknad på disse sakene, men då må ein vere tidlig ute, og det er nettopp organisasjonar som AER som kan vere på vakt og engasjere seg på eit tidlig tidspunkt.